Бұл туралы Экология, геология және табиғи ресурстар министрлігінің вице-министрі Әлия Шалабекова айтты.
“Жануардың өмірі, денсаулығы және жағдайы үшін иесінің жеке жауапкершілігі, оның ішінде әкімшілік және қылмыстық жауаптылық көзделген. Жануардың өліміне әкеп соққан құқық бұзушылық үшін жаза 120-дан 200 АЕК-ке дейін, ал қайталап бұзған кезде — 1 000 АЕК-ке дейін айыппұл салуға не бір жылға дейін бас бостандығынан айыруға қатаңдатылды”, — деді Әлия Шалабекова.
Ол атағандай, заң жобасы жануарларға қатысты жағымсыз көріністерге тосқауыл қояды.
“Мұндай көріністерге иттердің төбелесін өткізу, анестезиясыз ветеринария операциясын жүргізу, жануарларды заңсыз өлтіру, жануарларды әлсірету және оларға уақытылы көмек көрсетпеу, қатыгездікпен аулау, жануарлардың еті мен майын пайдалану, сонымен қатар жеуге және өнім алуға арналмаған әрекеттер жатады”, — деді ол.
Оның айтуынша, заң жобасының ережесін іске асыру үшін қолданыстағы заңнамаға өзгерістер мен толықтырулар енгізу талап етіледі.
Атап айтқанда:
— Қылмыстық кодекске;
— Әкімшілік құқық бұзушылық туралы кодекске;
— жергілікті мемлекеттік басқару және өзін-өзі басқару туралы; ветеринария туралы, жануарлар дүниесін қорғау, өсімін молайту және пайдалану туралы заңдарға.
“Жануарларға жауапкершілікпен қарау туралы” заң жобасын қабылдау Қазақстанның прогрессив, заманауи мемлекет ретіндегі имиджін нығайтып, барлық тіршілік иесіне адамгершілік пен ізгілікті қатынасты тәрбиелеуге, үй жануарларына қатысты тұрмыстық зорлық-зомбылықтың алдын алуға мүмкіндік береді деп санаймыз”, — деді ол.
