“Ресейден шыққан ағаш материалдарын рұқсатсыз қайта экспорттауға жол бермеу үшін отандық кәсіпорындарды шикізатпен қамтамасыз ете отырып, ағаштың жекелеген түрлерін Қазақстан Республикасының аумағынан әкетуге шыққан еліне қарамастан алты ай мерзімге тыйым салынады”, – делінген хабарламада.

Ведомствоаралық комиссия отырысында премьер-министрдің бірінші орынбасары Әлихан Смайылов экспорттық мораторийді алып тастау туралы шешім қабылданғанға дейін әр алты ай сайын шектеулерді автомат түрде жаңарту туралы ұсынысты мақұлдады.

Басқосуда күнбағыс тұқымы мен күнбағыс майының экспортының квотасын ұлғайту және табиғи уран мен оның қоспаларына экспорттық кедендік баж салығын енгізу мүмкіндігі жайында талқыланды.

Әлихан Смайылов тұқым өндірушілердің мүддесін ескере отырып, күнбағыс тұқымы мен күнбағыс майын экспорттауға квотаның оңтайлы көлемін анықтау және өнім бағасының өсуіне жол бермеу керек екенін баса айтты.