Балаларға арналған экология әліппесі

Қоршаған орта бәрімізге де ортақ. Ер жетіп, бой түзеген әрбір жеткіншектен бастап, еңкейген қартқа дейін табиғат ананың алдында жауаптымыз. Балаға кішкентай күнінен бастап экологиялық  сауатты болуды үйрету қажет. Бала кішкентайынан эко сауатты болса, өзінің табиғаттың бір бөлшегі екенін айқын сезінеді. Және өзін табиғаттан бөліп қарайтын эго да болмайды. Тілі шыққан сәттен бастап бала қоршаған ортаның әр түрлі құбылыстарына, ғажайыптарына тамсанумен болады. Алайда, кей жағдайда ата-ананың белгілі бір дәрежедегі эко сауатсыздығына байланысты бала өзін қоршаған әлемнің сан түрлі қыры мен сырының мән-мағынасын, астарлы құпиясын аша алмайды. Қалай? Неге? – деген сауалдармен көкірегін белгісіздік билейді. Бала бойына табиғатқа деген махаббатты және эко сауатты ояту үшін Отбасы хрестоматиясы баспасы шығарған «Экософия немесе киелі табиғат» кітабын, АРУНА баспасы ұсынатын   «Құстармен танысайық, « Төрт түлікпен таныс бол», «Жылдың төрт мезгілі”,  «Ауылда»,  «Батыл түйе» т.с.с балаларға арналған кітаптарды ұсына аламыз. Жаһандану заманында баланы тәрбиелеуші тағы бір құралы көгілдір экран немесе смартфон. Экрандық мәдениет ХХ ғ 80 жылдары дамыды дейтін болсақ, қазір цифрлық мәдениетке көштік. Десекте елімізде экран мәдениеті толыққанды, қарқынды дамыды деп айта алмаймыз. Дегенмен, киелі табиғат, бала мен қоршаған ортаның өзара байланысы жөнінде біршама телебағдарламалар бар. Балапан телерадио корпорациясы түсірген «Ғажайып өлке», «Жасыл ел» және «Табиғат мектебі» іспетті танымдық бағдарламалар балаларды табиғатпен достастыруға оң әсер етеді.